O BNG censura que o goberno local persista na política discrecional de subvencións nominativas

O Bloque Nacionalista Galego de Ferrol censura a decisión do goberno local que, ao mesmo tempo que "desistiu de presentar uns orzamentos propios" para esta ano 2019, "desenvolve a aprobación execpcional dun paquete de subvencións nominativas amparado polo Partido Popular".

O BNG, diante da proposta que será sometida ao ditame do pleno municipal co obxectivo de aprobar as subvencions nominativas, considera que o goberno local "desenvolve un reparto dos recursos económicos sen criterios obxectivos para que todos os colectivos da cidade poidan acceder a eles en igualdade de condicións".

Para o BNG resulta "ilustrativo" esta tipo de política económica exemplificado por exemplo "se comparamos o diñeiro que se destina a subvencions nominativas que supera o 1.7 millóns de euros para subvencións nominativas a entidades como EXPONAV, xestionada polo Ministerio de Defensa o cal non aboa un só euro por ocupar máis do 20% do solo urbano, as Confrarías de Semana Santa ou ao unha sociedade anónima como é o Racing de Ferrol, ou se comparamos os case 900.000 € destinados a subvencións nominativas en Deportes fronte aos 125.000 € de concorrencia competitiva."

Esta comparativa demostra que o feito fundamental para o goberno "é o reparto discrecional do diñeiro publico en detrimento de desenvolver unha política redistributiva en beneficio dos veciños e veciñas de Ferrol".

O BNG lamenta que o goberno local continue a desenvolver esta forma de repartir as axudas municipais porque "é inxusta e opaca, como xa expuxemos noutras ocasións". É por isto que o BNG considera que se debería desenvolver "unha nova forma de repartir as axudas municipais cunha forma de concorrencia competitiva transparente".