Eliximos Narón pide a inclusión dun Debate sobre o Estado do Concello

Eliximos Narón pide a inclusión dun Debate sobre o Estado do Concello no novo Regulamento Municipal e un límite razoable de mocións por Pleno. Eliximo Narón sinala que «dende o comezo da lexislatura estamos a ver un Goberno municipal sen unha clara liña de acción, carente de plans e programacións, mentres que é frecuente a improvisación. Creemos que tanto o actual tripartito coma futuros gobernos deben facer fronte a un Debate sobre o Estado do Concello no que expoñan, tanto ao Pleno coma a toda a cidadanía, cal é a súa visión da situación do Concello e cal foi o grado de cumprimento dos seus plans e promesas do anterior ano, para logo falar das súas liñas mestras de acción para o resto da lexislatura e as actuacións proxectadas para o seguinte ano.O debate levaríase a cabo todos os anos da lexislatura a excepción do ano de eleccións. Por outro lado, o recorte previsto polo Goberno que nos limita a unha sola moción por pleno (ao ser dúas para o Grupo Mixto) recorta de forma inxustificada a nosa labor de oposición deixándoa case reducida a de fiscalizar a súas actuacións sen poder propoñer alternativas e melloras para o Concello. Está claro que esta é unha actuación mais do tripartito de TEGA-BNG-PSOE para anular á oposición».