Este sabado péchanse os actos do dia de Naron cunha homenaxe a Antonio Martínez Aneiros

A parroquia naronesa do Val será o escenario este sábado dos actos que pecharán o programa conmemorativo do Día de Narón, que se celebra na localidade cada 23 de novembro. A partir das 17.00 horas comezará un acto institucional no que se dará o nome do exalcalde naronés Antonio Martínez Aneiros a unha rúa da parroquia, localizada xunto á cooperativa do Val. O alcalde, José Manuel Blanco, presidirá a convocatoria, que se iniciará co descubrimento da placa co nome de Martínez Aneiros na citada rúa.

A escasos metros, xunto ao local social da parroquia, continuará o acto, co descubrimento doutra placa que oficializa o nomeamento como “Complexo Social Antonio Martínez Aneiros” dun conxunto de instalacións localizadas na parroquia, entre as que ademais do local social están o centro de saúde, a escola e unha pista polideportiva cuberta.

Posteriormente tomará a palabra o exalcalde naronés, para proceder a pechar o acto o rexedor local.

A convocatoria deste recoñecemento ao que fora o primeiro alcalde da etapa democrática en Narón partiu da Asociación de Veciños “Os Irmandiños”, da parroquia do Val. Os representantes da Fundación Terra de Trasancos e da Sociedade Deportiva O Val sumáronse á proposta da entidade veciñal, que se aprobou no pleno do pasado mes de outubro por unanimidade da corporación local naronesa.